Dende l’ Asociaición Conceyu País Llionés, presentaron güei 26 y vienres la siguiente allegaición a favor la petición del Ayuntamientu Candín sobru camudare ‘l suo nome a Ancares.
Deillas razones d’ índoles varias, sofitan el dereichu Candín a camudare’ l nome al d’ Ancares pus yía el depositariu ya usuariu hestóricu d’ este corónimu.
Pur ende, esponen darréu:
L’ antecedente d’ esta supuesta griesca yía precisamente la previa expoliaición de la identidad ya toponímia llionesa, ya xustamente del topónimu d’ “Ancares”, propiu del territoriu de Candín, pur l’ Alministraición gallega.
Dengún argumentu, nin siquier etnográficu, nin munchu menos hestóricu yía daqué a considerase para punxiar este nome fuora de lu que yía’ l Valle d’ Ancares en sí, ha que l’ apropiación indebida’ l nome, en Galicia, yía perreciente, pus pasóu a metades del sieglu XX.
Comu bien sábese’ l riyu Ancares da- y nome al suo valle, dientru Llión, riyu’ l qual, dafechu, nun trespasa las llindes la nuesa provincia llionesa, pus habría de camudare de vertiente fasta’ l doutru lláu la sierra, cousa que nun tien xacíu. El riyu ya’ l suo valle que deillos teneden el nome d’ Ancares, soden braeiramente llioneses. Pur ende, ‘l camudu’ l nome nun tía daqué a amuelar doutras zonas foriatas, ya munchu menos a doutra comunidá autónoma que lu que tien de facere tía recurrire a la sua toponímia tradicional, ya nun apropiase de la doutra rexión, ya munchu menos está reclamarla comu suya, cuandu nun la tien n’ orixen nel suo territoriu. Lus criterios de territorialidad amuesan la petición del municipiu de Candín, ensin dubidia denguna.
La espansión del nome desendolcóuse pur motivos banales: una empresa maderera, un albergue robau a Pereda, una reserva caza franquista…, que nun respuenden a la identidad, nin la etnografia si non a la toma ensin permisu d’ una etiqueta turística que nel suo momentu fuona potente y’ atractiva abondu ya yía lu q’ agora, dempués d’ usurpala quereden protexer. Perú l’as argumentaiciones victimistas, comu la que agora esgrímese dende Galicia, nun siempres teneden la verdá, comu n’ este casu.
Pur doutru lláu, denunciamos la caludaición del nome, frutu de la sua moderna “adaptaición”, para punxialu en suelu gallegu. El nome orixinariu yía “Ancares”, ensin dengún artículu determinante (Nun yía “Lus Ancares”, nin munchu menos “Os Ancares”, que nun esistiena enxamás, yía un inventu de fae rellativamente pocas décadas).
Sofitar, d’ un xeitu gratuitu la llei de Réximene Llocal, comu ficienan doutros allegantes, que tan escontra, yía facelu cun amuelu, pus soden lus imitadores dafeichu lus que tien d’ aplicase esta regla. “El nome nun pue sere coincidente ou producire confuisiones cun doutras del territoriu l’ Estáu”. Pur ende, la llóxica ya dereichu, yía que, daquién apropiouse indebidamente’ l nome, abandónelu ya recupere la sua toponímia xenuina, pal suo propiu territoriu.
Ya nun hay mayor falta de respeutu que doutra comunidad autónoma (la mesma q’ usurpóu la toponimia) seya daquién a dar alternativas de nome, comu l’ absurdu “Candín d’ Ancares”. Y’ aprovechandu este cabeiru datu, recordare que lus únicos pueblos que llevan “l’ apellíu” “d’ Ancares” (ensin dengún artículu determinante) soden xustamente de Candín: Teixéu d’ Ancares ya Espiñeireda d’ Ancares, ya ‘l restu non, amuesandu au terminade tan engriescau nome: acullá d’ eisos pueblos enxamás utilizóuse’ l topónimu Ancares.
A tou este despropósitu d’ espoliu indentitariu, súmase – ya siguiente incongruencia: la UNESCO reconnoz, axebradamente la Reserva la Biosfera llionesa d’ Ancares, que coincide cul conxuntu lus territorios alministrativos que llevan el suo nome; En cambeu, la comunidad autónoma vecina nun lu tien nnidiu. Asina, pavias la UNESCO reconnoz la Reserva la Biosfera lus Ancares “gallegos”, lus cuáles soden 3 municipios: Navia de Suarna, Cervantes ya Becerrá; pul contrariu la Xunta de Galicia considera que la sua comarca de reciente creaición “Os Ancares” (que nun tien nin un sieglu) intégrase pur 6 municipios, lus enantias esmentaos ya tres más: Baralla, As Nogáis ya Piedrafita do Cebreiro; Nun hay correspondencia de criterios, seña que yía una reforma reciente ya interesada.
Dende Conceyu País Llionés, pescanciamos que’ l topóninu Ancares nun yía un nome propuestu ” ex novo”, si non que pertenez ancestralmente al territoriu’ l municipiu Candín, d’ usu consuetudinariu, ya yía’ l suo dereichu a seguire usándolu.
Pur doutru lláu, denunciamos l’ entrometimientu d’ outra comunidá autónoma que nun tien interés llexítimu nel territoriu llionés, nin pesu alministrativu dengunu, ya dengún doutru xeitu, asina comu la falta respetu a la identidad llionesa (concretamente l’ ancaresa), que deixa n’ entredichu la soberanía daquién braeiramente tien la potestad sobru’ l suo propiu territoriu. D’ admitilu, supondría que, daquién usurpóu’ l topónimu en cuestión, pa’ l suo propiu territoriu ya interés, agora seya daquién a apropiase, fraudulentamente, el poder de bloquear la sua recuperaición ha l’ usu al suo llexítimu duennu.
Sofitará la Xunta de Llión ya Castiella a Candín pur recuperar el suo nome orixinariu frente lus ataques de la Xunta de Galicia dempués l’ apropiación indebida la nuesa toponímia?
Región Leonesa, la 18ª Comunidad Autónoma Española
Rutas Geológicas por Zamora
No Comment! Be the first one.